“QIZILQUM FOSFORIT KOMPLEKSI” MCHJDA RAHBAR VA ISHCHI-XODIMLAR UCHRASHUVI BO‘LIB O‘TDI.
✅ Sayyor qabul shaklida o‘tkazilgan uchrashuvda “Qizilqum fosforit kompleksi” MChJ direktori Rustam Saliyev boshchiligidagi rahbariyat vakillari va jamiyat Kasaba uyushma qo‘mitasi raisi ishtirok etdi. Xodimlar va rahbariyat vakillari o‘rtasida do‘stona munosabatni shakllantirish, ishchi-xodimlarning muammolarini joyida hal qilish, ularning taklif va mulohazalarini yaqindan o‘rganish maqsadida o‘tkazilgan uchrashuv anchagina qizg‘in kechdi. ✍️ Uchrashuvda oylik maoshlarni oshirish, yo‘nalishli avtobus qatnovlaridagi muammolarga yechim berish, ishchilar yotoqxonasidagi kamchiliklarni bartaraf etish, korxona hududidagi yoritish chiroqlarini ko‘paytirish, yotoqxonalar, yuvinish xonalaridagi tozalik, ozodalik masalalariga e’tibor qaratish va nosoz holga kelgan texnikalar sabab ishlarning to‘xtab qolmasligi uchun asosli rejalar tuzish takliflari ilgari surildi. 🗓 Uch kun davomida korxonaning barcha bo‘lim va sexlarida o‘tkazilgan uchrashuvlarda minga yaqin ishchi-xodimlarning fikrlari tinglandi, qiynab kelayotgan ko‘plab muammolari joyida hal etilib, qiziqtirgan savollarga javoblar berildi. Hal etilishi vaqt talab etuvchi masalalar bo‘yicha qat’iy topshiriqlar mas’ullarga biriktirildi. Ushbu uchrashuvlar davomli tarzda har oyda o‘tkazilib turilishi rejalashtirib olindi.